பொன்னியின் செல்வன், தமிழ் விக்கி

வணக்கம் திரு ஜெயமோகன் அவர்களே,

எனது நண்பர் ஒருவர் பொன்னியின் செல்வன் ஆங்கில மொழிபெயர்ப்புகள் குறித்து பரிந்துரைகளைக் கேட்கிறார். தமிழில் பலமுறை படித்திருக்கிறேன் ஆனால் ஆங்கிலத்தில் இல்லை. ஏதேனும் ஆலோசனைகள் இருந்தால் பகிர்ந்து கொள்ள முடியுமா?

நன்றி

ஜெயகணேஷ்

***

அன்புள்ள ஜெய்கணேஷ்,

நீங்கள் நெடுநாள் வாசகர். இருந்தும் தமிழ்விக்கியை கவனிப்பதில்லை என நினைக்கிறேன். தமிழ்விக்கியின் பொன்னியின் செல்வன் கட்டுரையை இந்த தளத்தில் தொடர்ச்சியாக பதிவிட்டு வருகிறேன். அதில் பொன்னியின் செல்வன் பற்றிய எல்லா செய்திகளும் உள்ளன. மொழிபெயர்ப்புகள் பற்றி செய்திகள் உள்ளன. மட்டுமல்ல, மொழிபெயர்ப்பாளர்களுக்கும் தனிப் பதிவுகள் அதிலேயே ஹைப்பர் லிங்க் இணைப்புகளாக உள்ளன.

இத்தகைய கேள்விகளை பொதுவெளியில் கேட்பதே ஒரு பிழை. இதை வேறு எங்கும் அறிவுத்தளத்தில் எவரும் செய்வதில்லை. இதன்பொருட்டே கலைக்களஞ்சியங்கள் தயாரிக்கப்படுகின்றன. கலைக்களஞ்சியம் முழுமையாகவே முன்னால் திறந்திருக்கையிலும் இத்தகைய எளிய செய்திகளைக் கேட்பது சரியல்ல.

இலக்கியம், பண்பாடு பற்றிய எந்த செய்தி என்றாலும் அப்பெயருடன் அரைப்புள்ளி போட்டு Tamil wiki என சேர்த்து கூகிளில் தேடிப்பாருங்கள். பெரும்பாலும் முழுமையான செய்திகள் இருக்கும். இல்லை என்றால் உசாவுங்கள்

ஜெ

முந்தைய கட்டுரைஅ.குமாரசுவாமிப் புலவர் 
அடுத்த கட்டுரைசியமந்தகம், கட்டுரைகள்