«

»


Print this Post

தமிழ் இலக்கியத் தோட்டத்தின் விருது


உருவாக்க காலம் முதலே கனடாவின் இலக்கியத்தேட்டம் வழங்கும் விருதுகள் மேல் எனக்கு ஆர்வமும் ஒருவகை பங்களிப்பும் இருந்துள்ளது. தமிழகத்தின் கலாச்சார அரசியல் மற்றும் சாதிய அரசியல் காரணமாக புறக்கணிக்கப்படும் இலக்கிய முன்னோடிகளைக் கவுரவிப்பதற்கான முயற்சியாக அவை இருக்கவேண்டுமென்பதே நான் ஆரம்பம் முதல் சொல்லிவந்தது. தமிழகம் செய்யத்தவறும் விஷயங்களையே அதுசெய்யவேண்டும். ஏனெனெறால் அது அதற்கான தகுதி கொண்டவர்களால் உருவாக்கப்பட்ட அமைப்பு.

நான் எண்ணியதற்கு எதிராக, தமிழகப் பல்கலைக்கழக சிற்றரசியலுக்குள் சென்று விழுந்தபோது அதை மிகக்கடுமையாக எதிர்த்தமைக்குக் காரணமும் இதுவே. நேரடியாக வெளிப்படையாக எதிர்ப்பதற்கு முன்னர் மென்மையாக உள்விவாதங்களில் என் எதிர்ப்பைத் தெரிவித்திருக்கிறேன். அந்தக் கடுமையான எதிர்ப்பு அவ்வமைப்புக்கு நலம்தான் செய்தது என அதற்குள் இருப்பவர்கள் இன்று ஒப்புக்கொள்வார்கள் என்றே நினைக்கிறேன். இல்லையேல் பேராசிரியர்கள் ஒருவருக்கொருவர் கொடுத்துக்கொள்ளும் விருதுகளாக அவை தேய்ந்துபோயிருக்கக் கூடும்

சென்றவருடம் அம்பைக்கு அளிக்கப்பட்ட இயல் விருது எனக்கு மனநிறைவை அளித்தது. இவ்வருடம் ஐராவதம் மகாதேவனுக்கும் ஞானிக்கும் அளிக்கப்பட்ட விருது இயல் விருது என்னசெய்யவேண்டுமென நான் எண்ணினேனோ அதைச் செய்த விருது. அது மட்டுமே இன்று செய்யச்சாத்தியமான செயல் அது. அம்பை, ஞானி, ஐராவதம் ஆகிய மூவருமே இங்குள்ள எந்த அமைப்புக்களாலும் கௌரவிக்கப்படாதவர்கள். தங்கள் அளவில் சமரசமற்ற அறிவுச்செயல்பாட்டாளர்களாக அவர்கள் இருப்பதே அதற்கான காரணம். தமிழ்ச் சிந்தனைத்தளத்தில் அவர்களின் சாதனைகளை வரலாறு பதிவுசெய்யும்.

ஆகவே சென்னை இயல்விருது வழங்கும் விழாவில் ஐராவதம் மகாதேவனையும் ஞானியையும் அறிமுகம் செய்து பேசினேன். என்னைப்பொறுத்தவரை அது எனக்களிக்கப்பட்ட பெரும் கௌரவம். அதற்காகவே இயல் விருதுக்கு நான் கடமைப்பட்டவன். நான் இலக்கியத்தேட்டத்துக்கு அளித்த அந்த அங்கீகாரத்தை அவர்கள் எனக்களிக்கும்பொருட்டு இவ்வருட இலக்கிய தேட்ட விருதுகளில் புனைகதைக்கான விருது ’கொற்றவை’ நாவலுக்கு வழங்கப்பட்டிருக்கிறது. மகிழ்ச்சியூட்டும் அங்கீகாரம் அது.

என் படைப்புகளைப்பற்றி எனக்கு எப்போதுமே கர்வம் உண்டு. அதிலும் கொற்றவை தமிழின் எக்காலத்திலும் சிறந்த ஆக்கங்களில் ஒன்று. அதற்கு விருதளிப்பதன் மூலம் அந்த விருது தனக்கென ஒரு தரக்கட்டுப்பாட்டை தானே விதித்துக்கொள்கிறதென்றே நினைக்கிறேன். அப்படி எதிர்பார்க்கிறேன்

**

கனடிய தமிழ் இலக்கியத் தோட்டத்தின் விருது வழங்கும் விழா இந்த வருடம் இரு பிரிவுகளாக கொண்டாடப்பட்டது. இயல் விருது விழா சென்னையிலும் மற்றைய விருதுகளுக்கான விழா ரொறொன்ரோ பல்கலைக் கழக மண்டபத்திலும் நடைபெற்றன.

கடந்த ஐம்பது ஆண்டுகளுக்கு மேலாக தமிழிலக்கியத்தில் தீவிர சிந்தனையாளராகவும், கோட்பாட்டாளராகவும், திறனாய்வாளராகவும் இயங்கி வந்த திரு கோவை ஞானிக்கும், கல்வெட்டு ஆராய்ச்சிகள் மூலம் தமிழின் தொன்மையை உலகுக்கு உணர்த்திய திரு ஐராவதம் மகாதேவனுக்கும் இவ்வருடத்திய இயல் விருதுகள் வழங்கப்பட்டன.

ரொறொன்ரோ பல்கலைக் கழக மண்டபத்தில் 17 ஜூலை அன்று நடைபெற்ற விழாவில் ஏனைய விருதுகள் வழங்கப்பட்டன.

புனைவு விருது ஜெயமோகனுடைய கொற்றவை நாவலுக்கு வழங்கப்பட்டது.

அபுனைவு பிரிவில் இரு பரிசுகள் வழங்கப்பட்டன.

ஈழத்துத் தமிழ் நாவல் இலக்கியத்துக்காக கலாநிதி நா.சுப்பிரமணியன் அவர்களுக்கும்
ஆஷ் கொலையும் இந்தியப் புரட்சி இயக்கமும் என்ற நூலை எழுதிய ஆ.சிவசுப்பிரமணியன்
அவர்களுக்கும் இந்தப் பரிசுகள் வழங்கப்பட்டன.

கவிதை விருது ‘ பூமியை வாசிக்கும் சிறுமி’ கவிதை தொகுப்புக்காக கவிஞர் சுகுமாரனுக்கு வழங்கப்பட்டது.

சுந்தர ராமசாமி நினைவாக வழங்கப்படும் கணிமை விருது இந்த வருடம் தமிழ் லினக்ஸ் கே.டி.ஈ குழுவினருக்கு வழங்கப்பட்டது.

மாணவர் பரிசுத்திட்டத்தின் கீழ் அவர் எழுதிய கட்டுரைக்காக கிருபாளினி கிருபராஜாவுக்கு பரிசு வழங்கப்பட்டது.

விழாவில் சிகாகோ பல்கலைக் கழக பேராசிரியர் சாஷ எபலிங் ( Sascha Ebeling) சிறப்புரை ஆற்றினார்.

ரொறொன்ரோ விருது விழா 17 ஜூலை 2010 வீடியோ கொழுவி:

**

இலக்கியத்தேட்டம் விருது பெற்ற என் ஆதர்ச கவிஞர் சுகுமாரனையும் என் மதிப்புக்குரிய ஆ.சிவசுப்ரமணியன் அவர்களையும் நா.சுப்ரமணியம் அவர்களையும் வாழ்த்துகிறேன்

http://www.jeyamohan.in/?p=4244 வேதசகாயமுராஇன் விமர்சனங்கள்
http://www.jeyamohan.in/?p=6223 உலக இலக்கியச்சிமிழ்

http://www.jeyamohan.in/?p=7409 அலைகளென்பவை

தொடர்புடைய பதிவுகள்


Permanent link to this article: http://www.jeyamohan.in/7748

28 comments

Skip to comment form

  1. ramji_yahoo

    நெஞ்சம் நிறைந்த வாழ்த்துக்கள்.

    இந்த மகிழ்ச்சியான செய்தியை பகிர்ந்தமைக்கு நன்றிகள்.

  2. kuppaashok

    உங்களுக்கு விருது கிடைத்து நினைத்து பெருமகிழ்ச்சி கொள்கிறேன். வாழ்த்துகள் திரு.ஜெயமோகன் அவர்களே.

  3. down under

    கொற்றவை இன்னும் படிக்கவில்லை.தங்களின் உழைப்பிறகும் , திறமைக்கும் ,”குன்றா ஊக்கத்திற்கும் ” கிடைத்த அங்கீகாரம் இது .
    மகிழ்ச்சியுடன் வாழ்த்துகள் !

  4. kuppaashok

    வாழ்த்துகள் ஜெயமோகன் அவர்களே.

  5. senthilkumar

    வாழ்த்துக்கள் ஜெயமோகன்.
    இந்த விருது உங்களை ஊக்கபடுத்தியது இன்னமும் மகிழ்ச்சி அளிக்கிறது .

    கொற்றவை தற்போது கிடைக்கவில்லை (உடுமலை,anyindian ,விஜயபதிபகம் கோவை).

  6. kumarbabu

    நெஞ்சார்ந்த வாழ்த்துக்கள்.

  7. Madhan

    வாழ்த்துக்கள் ஜெயன்! :)

  8. ஜெயமோகன்

    கொற்றவை இப்போது தீர்ந்துவிட்டது. மறு அச்சு வரவேண்டும். அதற்கு வசந்தகுமார் நினைக்கவேண்டும். பார்ப்போம். ஜெ

  9. எம்.ஏ.சுசீலா

    அன்பின் ஜெ.எம்.,
    கொற்றவைக்கு மகுடம் சூட்டி இவ்விருது தன்னை கௌரவித்துக் கொண்டிருப்பதாகவே எண்ணுகிறேன்.
    மனமார்ந்த வாழ்த்துக்கள்.

  10. bhaskar

    வாழ்த்துக்கள் ஜெயமோகன்.

  11. jeevartist

    சம்பிரதாய வார்த்தைதான் , என்றாலும் இன் இனிய வாழ்த்துக்கள்!!!!

  12. Venugopal Krishnan

    Jemo,
    Congrats for the award….
    There is no shortcut to success which you have proved time and again.
    Few writers want to stay in limelight by abusing others, they will be forgotten over time…
    I started reading your website few years ago after reading some abuse about you from another writer.
    It’s very unfortunate to see how people convert your words and spread it, if you criticize some literary work or writer and if somebody feels it is wrong they can always give reason on why it is wrong, instead they just spread some wrong message not even written by you, I understand the intention behind it, but it’s very disgustful….
    Anyway thanks to that writer for introducing me your website, he is doing something good by that….

  13. arvind

    வண்ணாரப்பேட்ட கிள சார்பில் மாலெ…

  14. Marabin Maindan

    இன்னும் பெரிய விருதுகளுக்கும்
    இன்னபிற விருதுகளுக்கும் கொற்றவை முழுமையான தகுதிகள் கொண்டது.

  15. ஜெயமோகன்

    இன்றேய் தீனம் கனடாவிலே இருக்கின்ற அந்த இலக்கியத்தேட்டம் என்ற விருதினை இன்றேய் தீனம் சிறப்பான முறையிலே இன்றேய் தீனம் பெறுகின்ற அண்ணன் …))

  16. வேணுகோபால் தயாநிதி

    ரொம்ப சந்தோஷம் ஜெ.!

  17. Rajan

    தகுதியுள்ள படைப்புக் கொடுக்கப் பட்டுள்ள விருது அதனாலேயே சிறப்புப் பெறுகிறது. வாழ்த்துக்கள்.

    ராஜன்

  18. பிரேம் குமார்

    நெஞ்சு நிறைந்த வாழ்த்துகள்.
    ”கொற்றவை” இன்னும் மேலதிகமான தகுதிகளை உடையது. கொற்றவை படித்து உடனே “கன்னியாகுமரிக்கு பயணம் மேற்கொண்டது ஞாபகத்திற்க்கு வருகிறது. பூம்புகார் எனும் பழைய திரைப்படத்தை பார்த்து ஏமாந்ததும், நீங்கள் குறிப்பிட்ட ப.சரவணன் எழுதிய “சிலப்பதிகாரம்-எல்லாருக்குமான எளிய உரையுடன்” எனும் புத்தகத்தை வாசித்தும் கொண்டிருக்கிறேன்.
    பயணப்படவைத்த கொற்றவை க்கு விருது கிடைப்பது மிகுந்த மகிழ்ச்சி. வாழ்த்துகள்.

  19. Vengadesh Srinivasagam

    அன்பு ஜெமோ சார்,
    வாழ்த்துக்கள்.

    வசந்தகுமாரிடம் சொல்லி, விரைவில் புதுப்பதிப்பு கொணர வேண்டுகிறேன்.

  20. perumal

    வாழ்த்த வயதில்லை வணங்குகிறேன் சார்.

    பணிவன்புடன்
    பெருமாள்
    கரூர்

  21. hari_Dubai

    டியர் ஜெயமோகன் சார்,
    வாழ்த்துக்கள். விருதுகள் உங்களை மேலும் ஊக்க படுத்தட்டும்….

    உங்கள் தளத்தை தொடர்ந்து வாசிப்பவன்.

    உங்கள் நீயா நானா நிகழ்ச்சி பங்களிப்பு மிக அற்புதம். ஒரு சராசரி குடிமகனுடைய ஆதங்கத்தை பதிவு செய்ததற்காக…

  22. சாணக்கியன்

    கோவலன் – கண்ணகி அறிமுகத்திற்கு முன்னர் வரும் பழந்தமிழர்/திராவிடர் வரலாறென தாங்கள் முன்வைத்துள்ள புனைவு தமிழுக்கும் தமிழர்க்கும் சொத்து. ’கொற்றவை-முதல் 100 பக்கங்கள்’ என எழுத நினைத்திருந்தேன். ஏனெனில் அத்தகைய செறிவான நாவலைப்பற்றி ஒரே பதிவில் எழுதிவிட எனக்குத்திறன் இல்லை.

    கொற்றவைக்கு விருதுபெற்றமை குறித்து மிக்க மகிழ்ச்சி. வாழ்த்துகள்!

    தங்கள்,’காடு’ நாவல் ஆங்கிலத்தில் மொழிபெயர்க்கப்பட்டால் தமிழ் இலக்கியம் சர்வதேச அங்கீகாரம் பெறும் என்பது என் எண்ணம். அதை கிழக்குபதிப்பகத்துக்கு சொல்லியிருந்தேன்.

    அன்புடன்,
    சாணக்கியன்

  23. ஜெயமோகன்

    kannan: one of my friend experience in our Doctors http://nanbansuresh.blogspot.com/2010/02/blog-post_26.html

  24. snapjudge

    வாழ்த்துகள் :)

  25. va.srinivasan

    விருது பெற்றமைக்கு வாழ்த்துகள்.

  26. V.Ganesh

    Usual ஆக அதிகப்படி இரண்டு article மட்டுமே தினம் எழுதுபவர் திடீரென்று மூன்றாவது எழுதி இருக்கிறாரே என்று பார்த்தால் அது விருது.
    விருது பெற்றமைக்கு வாழ்த்துகள். ஆல் தி பெஸ்ட்.

  27. moulischandra

    மனம் நிறைந்த வாழ்த்துக்கள்!
    அன்புடன் எஸ். சந்திர மௌலி

  28. எம்.ஏ.சுசீலா

    இலக்கியத் தோட்ட விருது பற்றி நான் எழுதியுள்ள பதிவை இத் தளத்தில் பகிர்வுக்காக முன் வைக்கிறேன்.
    http://masusila.blogspot.com/2010/08/blog-post_22.html

Comments have been disabled.