«

»


Print this Post

சிந்துசமவெளி


இயக்குநர் சாமி மிருகம் படம் மூலம் பரவலாக அறியப்பட்டவர். அவரது அடுத்தபடம் சரித்திரம் சிலம்பாட்டத்தைப்பற்றியது. தயாரிப்பாலார் சிக்கலினால் அது தாமதமாகிறது. அதற்கு அடுத்து அவர் ‘சிந்துசமவெளி’ என்று ஒரு படம் எடுக்கிறார். அதற்கு நான் எழுதுகிறேன். படத்தின் பத்திரிகையாளர் சந்திப்பு சென்ற 11. 3. 2010 அன்று சென்னை ஆதித்யா ஓட்டல் அரங்கில் விருந்துடன் நடந்தது. நான் கலந்துகொண்டேன்.

 

சாமி

சிந்துசமவெளியில் என் பெயர் வசனம் என்ற இடத்தில் வந்தாலும் அதில் என் பங்களிப்பு சற்றே புதுமையானது. அந்தப்படத்தின் கதையும் முழுத்திரைக்கதையும் சாமியின் மனதில் நெடுங்காலமாக இருந்து வருபவை. அவருக்கு அதன் இன்னொரு வடிவம் தேவைப்பட்டது. கருவை என்னிடம் சொன்னார். நான் ஒரு சிறிய நாவலாக அதை எழுதிக்கொடுத்தேன்.

அதில் இருந்து தனக்கு தேவையான பகுதிகளை எடுத்துக்கொண்டு அவர் தன் திரைக்கதையை மேம்படுத்தினார். சில கதாபாத்திரங்கள் சேர்ந்தன. சில இடங்கள் இன்னும் அழுத்தம் பெற்றன. சில சந்தர்ப்பங்கள் மாறியமைந்தன. அதுவே என் பங்களிப்பு முழுத்திரைபடம் எடுக்க எடுக்கத்தான் தெளிவான வடிவம் கொள்ளும்

நான் எழுதிய விதத்தில் உற்சாகம் கொண்டு மேலும் அவரது இரு படங்களுக்குப் பணியாற்றவேண்டுமென கேட்டுக்கொண்டிருக்கிறார். இப்போது அவரது அடுத்தபடத்திற்காகத்தான் எழுதிக் கொண்டிருக்கிறேன்.

ஹரீஷ்

கேரளத்தில் வாகமண், தலைச்சேரி, பாலக்காடு பகுதிகளில் வரும் மார்ச் 25 முதல் படப்பிடிப்பு ஆரம்பிக்கிறது. ஒரே வீச்சாக மேமாதம் இரண்டாம் வாரத்தில் படப்பிடிப்பை முடிப்பதாக இருக்கிறார். மைக்கேல் ராயப்பன் படத்தை தயாரிக்கிறார். மேமாதம் மூன்றாம் வாரத்தில் சரித்திரம் மீண்டும் படப்பிடிப்பு ஆரம்பிக்கிறது.

கஜினி

சிந்துசமவெளி அனேகமாக புதுமுகங்கள் நடிக்கும் படம். கதாநாயகர்கள் இருவர். ஹரீஷ் ஏற்கனவே ஒருபடத்தில் நடித்துக்கொண்டிருக்கிறார். கஜினி சரித்திரத்தில் நடித்திருக்கிறார். அதில் அவரது நடிப்பால் கவரப்பட்டு இதில் நடிக்கவைக்கிறார் சாமி. 17 வருடங்களாக திரைவாய்ப்புக்காக முயன்றுவரும் கஜினி அடையாறு திரைக்கல்லூரி மாணவர்

கதாநாயகி அமலா பால் இப்போது ஓடிக்கொண்டிருக்கும் வீரசேகரன் படத்தில் நடித்தவர். மைனா என்று ஒரு படம் தயாரிப்பில் இருக்கிறது. எம்.டி.வாசுதேவன் நாயரின் பழைய திரைப்படமான நீலத்தாமரா வை மீண்டும் எடுத்தார்கள். அது ஒரு வெற்றிப்படம். அதில் கதாநாயகி அமலா பால் தான். மலையாளி.

அமலா பால்

இசை சுந்தச் சி பாபு. வீணைக்கலைஞர் சிட்டிபாபுவின் மகன். எனக்குப் பிடித்த குத்துப்பாடலான கத்தாழக்கண்ணாலே வுக்கு அவர்தான் இசை. இப்போது நிறைய படங்களுக்கு இசையமைக்கிறார். ஒளிப்பதிவு உத்பல் வி நாயனார். முப்பதுக்கும் மேற்பட்ட மலையாளப்படங்களுக்கு ஒளிப்பதிவுசெய்தவர்.

சுந்தர் சி பாபு

சிந்துசமவெளியில் என் வேலை மிக எளிதாகவே முடிந்துவிட்டது. இயக்குநர் தனக்கு என்ன வேண்டுமென்ற தெளிவுடன் இருந்தாரென்றால் வேலை எளிதாக  ஆகிவிடுகிறது. வணிக சினிமா என்பது ஒரு பெரும் கூட்டுழைப்பு. அதன் நடத்துநர் தலைவர் இயக்குநர். அவருக்கு நம் பங்களிப்பைப்பற்றிய மனச்சித்திரம் இருந்தால் போதும்.

இதழாளர் ஒருவர் என்னிடம் ‘திரைக்கு எழுதுவதில் உங்களுக்கு நிறைவு இருக்கிறதா?’ என்றார். திரை எழுத்தின் எல்லைகளையும் சாத்தியங்களையும் பற்றி நான் தெளிவாகவே இருக்கிறேன். எனக்கு திரைக்கு எழுதுவதென்பது மிக எளிதான ஒன்றாக இருக்கிறது. நான் இன்றுவரை திரையுலகில் சந்தித்த பெரும்பாலும் அனைவருமே நல்ல நண்பர்களாக, திரைவேலை முடிந்த பின்னரும் நீடிக்கிறார்கள்.

சினிமா எனக்கு அளிக்கும் சுதந்திரம் அளப்பரியது. பொருளாதார சுதந்திரம். அதை விட நேரம்.  இத்தனை பயணங்களும் எழுத்தும் சினிமா இல்லாமல் சாத்தியமாகியிருக்குமா என்று எண்ணிக்கொள்கையில்  இதன் முக்கியத்துவம் புரிகிறது ஆகவே ”ஆம், முழு நிறைவாக இருக்கிறது” என்று பதில் சொன்னேன்.

தொடர்புடைய பதிவுகள்


Permanent link to this article: http://www.jeyamohan.in/6808

9 comments

Skip to comment form

  1. kalyaanan

    சினிமா உங்களுக்கு எழுதுவதற்கான நேரத்தையும் பணத்தையும் அளிக்கிறது. உங்களுக்கு அதை எங்களைப்போன்ற வாசகர்கள் அளித்திருக்க வேண்டும். ஆனால் தமிழில் அதற்கு இடம் இல்லையே. நாங்கள் இலவசமாக ல்லவா வாசிக்கிறோம். சினிமாவுக்கு நாங்கல்தான் நன்றி சொல்லவேண்டும்

  2. ramji_yahoo

    பகிர்ந்தமைக்கு வாழ்த்துக்கள், உங்களின் இந்த புதிய படங்கள் வெற்றி படங்களாய் அமைய வாழ்த்துக்கள்.

    முந்தானை முடிச்சு ப்ரிவியு ஷோவில் பாக்யராஜ், பாலகுமாரனிடம் இதை தான் சொன்னாராம். சிம்சன் கம்பெனியில் ரிட்டைர் ஆகி கிடைக்கும் பணத்தை ஒரு வெற்றி படத்திலேயே பெற்று விடலாம் . பொருளாதார சுதந்திரம், பொருளாதார மன நிறைவு. இவை தானே சினிமா உலகிற்கு இன்றும் மக்களை ஈர்க்கும் சக்தி.

    நதிகள் (சிந்து, தாமிரபரணி, வைகை, காவிரி) மனிதர்களின் குணநலன்களை, பழக்க வழக்கத்தை மாறு படுத்துமா.

  3. pandiaraj

    ஜெ. சார் கவனத்திற்கு, நீலத்தாமரா படத்தின் கதாநாயகி அமலா பால் அல்ல, அர்ச்சனா. அவர் இன்னும் அழகு என நினைக்கிறேன். :)

  4. perumal

    கல்யாண் சாரை வழிமொழிகிறேன்.

    தங்களின் இணையதளத்தை ஓசியில் படிக்கும் போது குற்ற உணர்ச்சிதான் ஏற்படுகிறது. எனது பொருளாதார நிலைமை மேம்பட்டவுடன் தங்களுக்கு என்னால் முடிந்த கட்டணம் செலுத்துவேன்.

    பணிவன்புடன்
    பெருமாள்
    கரூர்

  5. V.Ganesh

    கரெக்ட். நானும் பலமுறை எண்ணியதுண்டு. தலைவர் வலையினை பார்க்க கட்டணம் வைத்தால் என்ன ஆகும் என்று..
    ஆனால் அதில் ஒரு சிக்கல். தலைவர் எழுதுவது அவருக்காக. எதோ நாமும் படிக்கிறோம். ஹி ஹி ……

  6. ramji_yahoo

    எழுத்தாளர்கள் (ஜெமோ, ஞானி, எஸ் ராமகிருஷ்ணன்,, விக்ரமாதித்தன், அய்யனார், லேகா, கலாப்ரியா ) போன்றோர் வலையினை பார்க்க கட்டணம் வைக்கலாம்.

  7. rajmohanbabu

    நாம் ஜெ.மோ வின் புத்தககளை வாங்கி படிக்க வேண்டும். அதுவே நாம் அவரின் அன்புக்கு செய்யும் பிரதி ஆகும்.
    அன்புடன்,
    ராஜ்மோகன்

  8. Ramachandra Sarma

    நமது மனம் அனைத்தையும் பணத்தால் அளவிடுவதிலேயே நின்றுபோய்விடுகிறதே ஏன்? கட்டணம் செலுத்தி நமது குற்றவுணர்ச்சியை நீக்கமுடியும் என்று நீங்கள் நம்புவது எந்தவிதத்தில் சரியென்று புரியவில்லை. கட்டணம் செலுத்திவிட்டால் ஆனைக்கும் பானைக்கும் சரியென்று செய்துவிடலாம் என்று நினைக்கிறீர்களா? இதை குற்றவுணர்ச்சி என்று சொல்வதை விட கடமைபட்டிருப்பதாகச்சொல்ல வேண்டும். தாயிடம் நமக்குத்தோன்றுவது குற்றவுணர்ச்சியல்லவே? கட்டணம் வைப்பதை நான் வரவேற்கிறேன். ஆனால் அது வாசகர் வட்டத்தை செறிவூட்டுவதற்காக மட்டுமே. ஏதோ கடன் போலவும் காசு கொடுத்துவிட்டால் எல்லாம் சரியாகிவிடும் என்பதுபோலவும் பேசுவது சரியல்ல. ஜெவின் புத்தகங்களை வாங்கிப்படிப்பதால் அவரை விட லாபம் நமக்குத்தான் அதிகம். ஆசிரியருக்கு நான் செய்யக்கூடியதெல்லாம்….? நீங்களே சொல்லுங்களேன்?

  9. perumal

    திரு ராமச்சந்திர சர்மா சார் எனது வார்த்தை பிரயோகம் (குற்றஉணர்ச்சி) தவறாக தெரிந்தால் அதற்க்கு வருந்துகிறேன்.

    /////ஆனைக்கும் பானைக்கும் சரியென்று செய்துவிடலாம் என்று நினைக்கிறீர்களா? /////

    நிச்சயம் நான் அவ்வாறு நினைக்கவில்லை. எழுத்தை பணத்தால் அளவிடுவது தவறுதான்.
    வேறு என்ன தான் செய்யமுடியும்?

    பிரியமுடன்
    பெருமாள்
    கரூர்

Comments have been disabled.