«

»


Print this Post

மலேசியாவிலே…


மலேசியாவிற்கு வந்து ஐந்து நாட்களாகிறது. எதுவுமே எழுதமுடியாதபடி நாட்கள் பறக்கின்றன. அனேகமாக அதிகாலை எழுந்ததுமே பயணத்திட்டங்கள். ஏழரை மணிக்கெல்லாம் வண்டி வந்துவிடும். குளித்து உடைமாற்றி கிளம்பினால் தினம் ஓர் இடம். இங்கே மத்திய நகர்ப்புரவிரிவாக்க இணையமைச்சர் ட்த்தோ சரவணன் அவர்களின் விருந்தினர்களாக வந்திருக்கிறோம். கிராண்ட் சீசன்ஸ் என்ற நட்சத்திர விடுதியில் வாசம். பயண ஏற்பாடுகளையும் அமைச்சரே செய்திருப்பதனால் ஏராளமான இடங்கள்.

இந்தப்பயணத்தின் சிறப்பு என்னவென்றால் சாதாரணமாக பயணிகள் செல்ல வாய்ப்பில்லாத இடங்களுக்கெல்லாம் செல்ல முடிந்தது என்பதே. நகரத்தின் பல்வேறு சந்துபொந்துகள், உணவகங்கள் மட்டுமல்லாமல் வெளியே அமைச்சரின் தொகுதிக்குள் உள்ள கிராமங்கள், பழங்குடியினரின் குடியிருப்புகள் போன்ற இடங்களுக்கெல்லாம் சென்று பார்க்க முடிந்தது. மலேசிய உள்கிராமப்புறங்கள் கேரளம் போலவே இருக்கின்றன. கொலாலம்பூரின் ஆர்ப்பாட்டமான நகரத்தனத்துக்கு அப்பால் அவை இன்னமும் நடுத்தர மக்களின், வறிய மக்களின் உலகமாக உள்ளன

நாங்கள் இங்கே வந்ததே தைப்பூச நிகழ்ச்சிகளைக் கொண்டாடுவதற்காகத்தான். தைப்பூசம் மலேசியாவில் தேசிய விடுமுறை நாள். பத்து மலையில் இரண்டு லட்சம்பேர் வரை கூடுவதைக் கண்டோம்.  ஒருவாரம் முழுக்க தைப்பூசக் கொண்டாட்டங்கள். காவடி , அலகுகுத்துதல், பால்குடம் எடுத்தல்…பெரும்கூட்டம் தோளோடு தோளாக நெருக்கி ஒழுகிச்சென்றதில் ஊடே சென்றது எப்போதும் போலவே உற்சாகத்தை அளித்தது.

நாஞ்சில்நாடன் உடனறையர். இருபது வருடங்களாக பேசிக்கொண்டே இருப்பவர்கள் நாங்கள் . ஆகவே ஏராளமாக மேலும் பேசிக்கொண்டோம்.  அழுக்குச்ச்சட்டைகளைக்கூட நீவி கச்சிதமாக மடித்து திருப்பி பெட்டிக்குள் வைக்கும் அவரது போக்கு எனக்கு வேடிக்கையாக இருதது. முகந்ந்தால்தான் எது புதிது என்று தெரியும். உபயோகித்தது நறுமணமாக இருக்கும் – வாசனைத்திரவம்.

நாஞ்சில் விமானத்தில் ஏறியதுமே கடந்த இரண்டு ஆண்டுகளாக அவர் கொண்டிருக்கும் விரதங்கள் சிலவற்றை கடாசிவிட்டார் என்பதை தமிழ்கூறும் நல்லுலகத்திற்குச் சொல்லியாகவேண்டும். விமானத்திலேயே ஒரு விஸ்கி- ஆன் த ராக்ஸ்- வாங்கி பனிக்கட்டிகளுடன் உறிஞ்சினார். கீழிறங்கியதுமே சிக்கன், மட்டன். ”நம்மளை மதிச்சு கூப்பிட்டவங்க மனசு நோகப்பிடாது”என்று சொல்லி ”பெயக்கண்டும் நஞ்சுண்டு அமைவர் நயத்தக்க நாகரீகம் வேண்டுபவர்” என்று குறளையும் சொல்லிவிட்டார். வேறு வழியே இல்லை.

தொடர்புடைய பதிவுகள்


Permanent link to this article: http://www.jeyamohan.in/6416

10 comments

Skip to comment form

  1. bala

    cheers Naanjil sir:) welcome to Mumbai as well – bala

  2. kuppan_yahoo

    நான் குறையாக சொல்லவில்லை, இருந்தாலும் கேட்கிறேன்.

    ஒரு அமைச்சர் மக்களின் வரிப்பணத்தில் இப்படி எழுத்தாளர்களையோ அவருக்கு பிடித்தமானவர்களையோ தங்க வைத்து செலவு செய்வது நியாயமா.

    இதே போல இந்தியாவில் எத்தனை அமைச்சர்கள் அரசு பணத்தை செலவு செய்து கொண்டு இருக்கிறார்களோ.

  3. K.R அதியமான்

    மலேசியா இரண்டாம் உலகப்போரில் மிக கடுமையாக நாசமடைந்தது. 1945இல் இந்தியாவை விட பல மடங்கு மோசமான நிலையில் இருந்தது. இந்தியா பாணி பொருளாதார கொள்கைகளை அங்கு அமலாக்கவில்லை. சந்தை பொருளாதாரம் தான். அதனால் அங்கு செழிப்பு. அதை பற்றி விசாரித்து, ஒப்பிட்டு எழுதுங்களேன்.

  4. saran76

    அன்புள்ள ஜெயமோகன்
    வணக்கம்……
    இந்த பயண திட்டத்தில் சிங்கப்பூர் வரும் எண்ணம் உள்ளதா? உங்களை சந்திக்க, பேச, நிகழ்ச்சிகளில் கலந்துகொள்ள ஆர்வமாக உள்ளோம்.

    தங்கள் பயணம் இனிமையாக அமைய அன்பு வாழ்த்துக்கள்.

    தங்கள் நீண்டநாளைய வாசகர்கள்

    சரவணன்
    தேசிய பல்கலைகழகம், சிங்கப்பூர்.

  5. jeevartist

    நாஞ்சில் விரதத்தை முடித்துக்கொண்டாரா? நம்பவே முடியவில்லை!

  6. ஜெயமோகன்

    அன்புள்ள குப்பன்,

    முதல் விஷயம் இது அரசு முறைப் பயணம் அல்ல. அரசுப்பணமும் அல்ல. அமைச்சரின் சொந்தப்பணம். மலேசியா இந்தியா போன்ற சோஷலிச பாவனை உடைய நாடு அல்ல. அங்கே ஓர் அரசியல்வாதி பலவகையில் அவரது ஆளுமையை உருவாக்கவும் நிறுவவும், அவரது இயல்பை மக்களிடம் எடுத்துசெல்லவும் இன்னும்பல்வேறு விஷயங்களுக்கும் கட்சி நிதியை/ தனிப்பட்ட நிதியை/ நன்கொடைகளை சட்டபூர்வமாகவே செலவிட முடியும்

    ஜெ

  7. ஜெயமோகன்

    மறுபடி விரதம் இருக்கப்போவதாகச் சொல்கிறார். அதை என்னாலும் நம்ப முடியவில்லை

  8. Marabin Maindan

    திரு.குப்பன் அவர்களே
    எங்கள் பயணம் அரசு வரிப்பணத்தில் அல்ல.அமைச்சர் ஒரு தொழிலதிபர்.
    கம்பன் கழகம்,கண்ணதாசன் அறவாரியம் ஆகியன அமைத்து நடத்தி வருபவர்.அவரது தனிப்பட்ட விருந்தினர்களாகத்தான் சென்றோம்.இதை உங்கள் கவனத்திற்குக் கொண்டு வருகிறேன்.

  9. kanaga lakshmanan

    ஜெயமோஹன் போன்ற எழுத்தாளர்கள் அரசு முறை பயணமாக செல்லும் காலம் வந்தால் நன்றாகத்தான் இருக்கும். (வரி பணத்தில் பயணம் மேற்கொள்ள அதென்ன தமிழ்நாடா??)

  10. baski

    நல்ல எழுத்தாளர்களையும், சிறந்த கலைஞர்களையும், இன்ன பிற சாதனையாளர்களையும், அரசு முறை விருந்தினர்களாக அழைப்பது செலவீனமாகாது. மாறாக, தம் மக்களின் கலாச்சார ஏற்றத்துக்காக செய்யப்படும் முதலீடு ஆகும். திரு குப்பன் அவர்கள் இது எந்த வகையில் தவறு என்று கருதுகிறார் ?
    http://baski-reviews.blogspot.com

Comments have been disabled.