«

»


Print this Post

இலக்கிய இடக்கரடக்கல்கள்


அறிமுக இலக்கிய வாசகர்களுக்காக ஒரு சிறு பட்டியல். கீழ்க்கண்ட சொற்றொடர்களுக்கு அடைப்புக்குள் உள்ள பொருள் இருக்க வாய்ப்புண்டு.

1  தேர்ந்த வாசகர்களுக்காக மட்டும் எழுதும் படைப்பாளி இவர் [அதிகம்பேர் இவரைப் படிப்பதில்லை]

2  இந்த எழுத்தாளர் அனைத்துத் தரப்பினரும் விரும்பி வாசிக்கும்படி எழுதுகிறார் [ எழுதிப் பிழைக்கிறார்]

3  இந்த இளம் படைப்பாளியிடம் மேலும் மேலும் சிறந்த ஆக்கங்களை எதிர்பார்க்கலாம் [இப்போது ஒன்றும் தேறாது]

4  மிகையில்லாத நடையில் சித்தரிப்புகளை அளிப்பவர் இவர் [தாசில்தார் அறிக்கை போல]

5  ஆற்றொழுக்கான நடை கொண்ட எழுத்து இவருடையது [ வழக்கமான  பத்திரிகை நடையில் நீளமாக எழுதுவார்]

6  சமகால சிக்கல்களை இவர் தன் எழுத்தில் எதிர்கொள்கிறார் [எல்லாரும் சொல்வதையே இவரும் சொல்கிறார்]

7  முற்போக்கான அரசியல் மற்றும் சமூக நிலைப்பாடு கொண்ட படைப்பாளி [கட்சி ஆள்]

8  விமரிசனங்களைப் பெருந்தன்மையுடன் ஏற்றுக்கொள்ளும் படைப்பாளி அவர் [பொருமுவதோடு சரி]

9  ஆரம்பத்தில் கவிதைகளும் எழுதிய பின் உரைநடைக்கு வந்தார் [நல்லவேளை]

10 இவ்விரு படைப்பாளிகளையும் இரட்டையர் என்றே சொல்லலாம் [இருவரும் ஒரே சாதி]

11 நேர்கோடற்ற எழுத்துமுறை இவருடையது [நினைவுக்கு வந்த வரிசையில் எழுதுவார்]

12 இவரது எழுத்துமுறை தானியங்கி எழுத்து வகையிலானது [எழுவாய் பயனிலை இருக்காது]

13 எழுத்தாளர் எம் சிற்றிதழ்களைக் கூர்ந்து படிப்பார் [ தன்னைப்பற்றி என்ன வந்திருக்கிறது என]

14 அவரது எழுத்து எப்போதும் சுயசரிதைத்தன்மை கொண்டது [கற்பனை செய்ய அவரால் முடியாது]

15 அவருடைய எழுத்தில் நகைச்சுவை அதிகம் [வசைபாடும்போது]

16 மேலைச்சிந்தனைகளைத் தமிழுக்குக் கொண்டுவருகிறார் [மேற்கோள் பொறுக்கி]

17 தீவிரமான கோட்பாட்டு நடை கொண்டவர் இவர் [ தானே புரிந்துகொள்ளாமல்  எழுதுகிறார்]

18 இவரைத் தமிழ் சமூகம் பொருட்படுத்தவேயில்லை [ஒரு முழுத்தொகுப்பு கொண்டுவந்தால் ஆள் அவ்வளவுதான்]

19 அழகான கட்டமைப்பு கொண்ட நூல் இது [ அட்டை கண்ணைக் குத்துகிறது]

20 இளம் எழுத்தாளர்களை ஊக்குவித்த விமரிசகர் இவர் [ எல்லாரையும் பாராட்டுவார்]

21 கறாரான இலக்கிய நிலைப்பாடுகள் கொண்ட விமரிசகர் இவர் [எல்லாரையும் திட்டுவார்]

22 இலக்கியம் மக்களுக்குப் பயன்படவேண்டும் [கட்சிநிலைப்பாடை ஏற்றுக்கொள்வதன் வழியாக]

23 எதிர்கால வாசகனுக்காகவே எழுதுகிறேன் [ தயவுசெய்து இப்போது யாராவது படியுங்கள்]

24 கவிதைகளைத் தபால்கார்டில் அனுப்பவேண்டாம் [சந்தா பணத்துடன் அனுப்பவும்]

25 தமிழிலக்கியம் சீர்கெட்டுக் கிடக்கிறது [ஆகவே சிற்றிதழைத் தொடங்குகிறோம்]

26 தமிழிலக்கிய உலகம் சீர்குலைந்துவிட்டது [ஆகவே சிற்றிதழை நிறுத்திக் கொள்கிறோம்]

27 ஆதரவளித்த நெஞ்சங்களுக்கு நன்றி [ சந்தாவைத் திருப்பியளிக்க முடியாது]

28 ஆர்வமூட்டும் வாசிப்புத்தன்மை கொண்ட படைப்பு [ஆழமில்லை. பொழுதுபோகாவிட்டால் படிக்கலாம்]

29 பெண்களின் அகச்சிக்கல்களை எழுதிய பெண்கவிஞர் இவர் [ வழக்கமான புலம்பல்]

30 எழுத்தாளர்கள் சமூக நலனுக்காகப் பாடுபட வேண்டும் [ஊழலை நாங்கள் செய்துகொள்கிறோம்]

31 திராவிட இயக்கத்தில் நல்ல எழுத்தாளர்கள் இல்லை என்று யார் சொன்னது? [அவரை மட்டுமாவது சொல்லிவிடுங்கள்]

32 பலதளங்களைத் தொட்டுச்செல்லும் படைப்பு இது [ எங்கேபோவதென்றே தெரியாமல்]

33 தாவித்தாவிச் சொல்லிச் செல்லும் சிறிய நாவல்  [ குறிப்புகளையே நாவலாக்கிவிட்டிருக்கிறார்]

34 இந்த நாவலசிரியர் கடும் உழைப்பாளி [ நன்றாக முட்டிப்பார்த்திருக்கிறார்]

35 மொழியைத் தன் கட்டுப்பாட்டில் வைத்திருக்கிறார் [ஒரேமாதிரித்தான் எழுதுவார்]

36 நுட்பமாக எழுதும் பழக்கம் கொண்டவர் இவர் [ முக்கி முக்கி தினம் கால்பக்கம் எழுதுவார்]

37 மூலநூலின் சுவை குன்றாமல் மொழிபெயர்க்கப்பட்டுள்ளது [ கதைச்சுருக்கம்தான் ]

38 மூலத்துக்கு நேர்மையான மொழிபெயர்ப்பு [படிக்க முடியாத நடை]

39 அவரது கடிதங்களில் அவர் வேறொருவராக வெளிப்படுகிறார் [வெளிப்பட்டுவிடுகிறார்]

40 அறக்கோபம் வெளிப்படும் கவிதைகள் இவை [ கூச்சல்கள்]

41 இவர் வளரும் எழுத்தாளர் [நெடுநாட்களாக எழுதியும் ஒன்றும் பேரவில்லை]

42 இந்த நூலைப்பற்றிப் பேசுவதற்கு முன் சில விஷயங்களைத் தெளிவுபடுத்த வேண்டியுள்ளது [நூலை நான் இன்னும் படிக்கவில்லை]

43 மூத்த எழுத்தாளரின் கருத்துக்கு மதிப்பளிக்கிறேன் [அவருக்கு இப்போது ஒரு மதிப்பும் இல்லை]

44 எழுத்தாளர் ‘கெ’ ஒரு சகாப்தம் [ பழைய கட்டை]

45 இவர் எழுத்தில் மண்மணம் வீசுகிறது [கிராமத்திலே கேள்விப்பட்டவற்றை எழுதுகிறார்]

46 இவர் இலக்கிய வம்புகளில் ஈடுபடுவதேயில்லை [ஆர்வமாகப் படித்துப் பேசிக்கொண்டிருந்தாலும் எழுதமாட்டார்]

47 இந்த முழுத்தொகுப்பைக் கொண்டுவருவதில் பெருமை அடைகிறோம் [இனிமேல் புட்டுப்புட்டும் கொண்டுவருவோம்]

48 எங்கள் இதழ் பத்தாயிரம் பிரதி விற்கிறது [அவர்கள் மட்டும் எட்டாயிரம் சொல்கிறார்களே]

49 நல்ல படைப்பு, சற்று சுருக்கியிருக்கலாம் [விட்டுவிட்டுதான் படித்தேன்]

50 இவர் பழகுவதற்கு எளிமையானவர் [ நன்றாக எழுதுகிறீர்கள் என்று சொன்னதுமே நம்பிவிடுவார்]

51 சமூகத்துக்கு எதிரான கலகக்காரர் [ தண்ணிகேஸ்]

52 முற்போக்கான புரட்சிகர அரசியல் கொண்டவர் [ இந்திய எதிர்ப்பாளர்]

53 சமூகசேவைகளில் ஈடுபடுகிறார் [ என்.ஜி.ஓ. தொடர்புகள் உண்டு]

54 இளம் எழுத்தாளர்கள் நிறைய படிக்க வேண்டும் [கொஞ்சம் கம்மியாகவே எழுதலாம்]

55 ஊடக ஆய்வு [சினிமா விமரிசனம்]

56 சிறுகதையின் திருமூலர் [வேறுபலரால் உருவாக்கப்பட்டவர்]

57 தமிழியக்கவாதி  [தமிழாசிரியர்]

58 இலக்கணநோக்கு கொண்டவர் [ புரூஃப் பார்ப்பார்]

59 வித்தியாசமான பேராசிரியர் [ குறைந்த வட்டிக்குப் பணம் விடுகிறார்]

60 வித்தியாசமான எழுத்தாளர் [ எல்லா எழுத்தாளர்களையும் போல]

மறுபிரசுரம் முதற்பிரசுரம் 2011 ஜூலை

மூத்த எழுத்தாளர்கள் அடிக்கடி சொல்லும் பொய்கள்

நீங்களும் பின் நவீனத்துவக் கட்டுரை வனையலாம்.

நீங்களும் புதுக்கவிதை எழுதலாம்

புதுக்கவிதை சுருக்கமான வரலாறு

சிற்றிதழ்கள்- ஓர் ஆய்வறிக்கை

தொடர்புடைய பதிவுகள்

  • தொடர்புடைய பதிவுகள் இல்லை

Permanent link to this article: http://www.jeyamohan.in/483

5 comments

Skip to comment form

  1. Senthilkumar

    அறிமுக என்பதை அதிமுக என்று வேகமாக படித்து விட்டேன் இருப்பின் வித்தியாசம் தெரியவில்லை.

  2. ushadeepan

    ஆனாலும் கிண்டலும் கேலியும் ரொம்ப ஜாஸ்திதான் சார் உங்களுக்கு…

  3. sathyanandhan

    அன்பு ஜெயமோஹன், வணக்கம். மிகவும் ரசித்து வாசித்தேன். வாய்விட்டு சிரிக்கவும் மறுபடி வாசித்து சிரிக்கவும் வைத்தது. நல்ல நகைச்சுவை உங்களுக்குள் இருக்கிறது. முன்பு ஒரு கவிதை பற்றி கிண்டலடித்தது நினைவுக்கு வருகிறது. நன்றி அன்பு சத்யானந்தன்

  4. கோபாலன்

    உண்மையாகவே நெடுநாட்களாயிற்று, இப்படி ஒரு நல்ல நகைச்சுவையைக் கண்டு. ஆனால் அத்தனையும் உண்மை, அய்யா!

  5. rajasundararajan

    செமை! செமை! (20. ஆனால் இது ‘முது’ உள்ளடக்கம்)

Comments have been disabled.