«

»


Print this Post

‘நூலகத்தில்’ – கடிதங்கள்


மிக எளிய கதை. ஆனால் அழகாக சொல்லப்பட்டிருகிறது. செக்காவ் அல்லது கால்வினோ பாணி கதைபோல அல்லது ஒரு ஆங்கிலக் கதைபோல. அந்தச் சாயல்கள் முழுமையாகத் தெரிகிறது இந்தக் கதையில். வயலட் வின்ஸ்பியரின் லூசிஃபர் ஏஞ்சலுக்காக வெற்றிவேல் லூசிஃபர் ஜே வயலட்டாக மாறியிருக்கிறார் என தெரிகிறது. கதாபாத்திரங்கள் அவனை அழுத்துவதிலிருந்தே தெரிகிறது அவன் எந்த அளவிற்குக் கற்பனை உலகில் வாழ்கிறான். நல்ல கதைக்குப் பெரிய வாழ்த்துக்கள் லூசிஃபர் வயலட்.

கே.ஜே.அசோக் குமார்

அன்புள்ள ஜெ,

நூலகத்தில் எனக்குப் பிடித்திருந்தது. என்ன என்று சொல்லத்தெரியவில்லை. சிலசமயம் நாம் காண்பதெல்லாம் வெறும் மாயையா என்று தோன்றும். அதிலும் சென்னை மாதிரி பெரிய நகரத்தில் தனிமையிலே வாழும்போது எல்லாரும் எதிரிகளாகத் தெரிவார்கள். திடீரென்று அத்தனைபேரும் தெரிந்தவர்கள் மாதிரி இருப்பார்கள். எல்லாம் ஒன்றுடன் ஒன்று தொடர்புள்ளவை மாதிரி இருக்கும். அந்த மாயநிலையை அழகாக எழுதியிருக்கிறார்.

எஸ்.குமரன்

அன்புள்ல ஜெ

நூலகத்தில் பிடித்த கதை. தமிழில் காஃப்கா வகையிலான கதைகளை சுரேஷ்குமார இந்திரஜித் எழுதியிருக்கிறார். அந்த மாதிரியான கதை.

கனவுக்கும் நனவுக்கும் இடையே இருக்கிறது கதை. கொலைசெய்ய வருபவன் கனவு. நூலகத்தில் சந்தித்த பெண் நனவு. ஆனால் நனவும்கூட ஒருவகை கனவாக இருக்கலாம். அந்தக் கனவுக்கு சமானமாக இவனே உருவாக்கிக்கொண்டதாக இருக்கலாம். தராசின் மறுதட்டு மாதிரி.

ஒன்று கனவு, இன்னொன்று உருவெளித்தோற்றம். ஒன்று அச்சத்க்தால் வருகிறது. இன்னொன்று ஆசையால் வருகிறது. ஒன்று வாழ்க்கையின் பயம். இன்னொன்று வாழ்க்கையின் வசீகரம். நூலகத்திலே அந்த கனவு நிகழ்வது அழகான கற்பனை. இரண்டு தராசுத் தட்டுக்கும் நடுவே ஆடக்கூடிய முள் மாதிரி கதைசொல்லியின் பிரக்ஞை இருக்கிறது.

இன்னொண்ரும் தோன்றுகிறது. இந்தப்பெண் உருவாக்கக்கூடிய பயம்தான் கொலையாக வரும் கனவா? இருக்கலாம்.

நம்மை எவரேனும் கொல்லவரும் கனவு வந்தால் அது நம்முடைய ஆழ்மன விருப்பத்தின் விளைவு என்பார்கள். அப்படியென்றால் விருப்பம் வெளிப்படும் அந்த நனவு போன்ற கனவு எந்த உணர்ச்சியின் வெளிப்பாடு ?

சரவணன்

தொடர்புடைய பதிவுகள்


Permanent link to this article: http://www.jeyamohan.in/41006